纳西快板

要听党的话

Dai shel komi naiq

作词：古城区政协 和继元

Mil: Ngv lv cheq mewaq,                  雪山非此地，

Ngv perq cheq tvyel;                       白银已到此；

Yi bbiq cheq mewaq,                       金江非此地，

Haiq mal cheq tvyel;                       金沙已到此；

Hhoq yel cheq mewaq,                    俄亚非此地，

Yul herq cheq tvyel;                        翠玉已到此；

Hho zo cheq mewaq,                       拉萨非此地，

Pvl naq cheq tvyel.                         氆氇已到此；

Reiq miq dal huiltaiq,                     人民大会堂，

Befji jju meqnal;                           建在北京城；

Dai gge sheef jedal,                       党的十九大，

Ko'ee sal'ee tee;                            会议精神哟；

Ceel mee her perqtv,                      秋天吹北风，

Her perq chee bbaqnee,                    就由这股风，

Yiggv naq ddiuqkol,                       丽江纳西地，

Tv ceeq zeel wenal,                       虽说吹来了，

Seiq huf shel neiqmei,                     但是说什么，

Me see pil seiqyil;                         具体不知道；

Kaikeel ddeeqzzerq zzeeq，             门前香樟树，

Ddeeq mei chee gvlnee;                    敬请长辈哟；

Geeq tv geebbaqdiai,                       天上点星花，

Ddee diai neiq yelmeil!                    指点一下吧！

Sso: Dai gge sheef je dal,         党的十九大，

Huilyil chee huil nvl;            这个会议呀；

2017 N,                       二零一七年，

10 Y 18 R;                    十月十八日；

24 gol ba,                     到二十四日，

Sher hal rheeqsheeq loq,         七天时间里，

Reiqmiq dalhuil taiq，          人民大会堂，

Huiltaiq chee loq nee，         会堂这里面，

Zhalkai yel jji seiq.             已经召开了。

Dalhuil chee huil loq,           这个会议里，

Sif zo seejil nee,               习总书记哪，

Zhugueq gulcaidai,             中国共产党，

Dil sheef baq jail gge,           第十八届的，

Zhuyai weiyuaiqhuil,           中央委员会，

Teiq dailbia bbei nvq;           受全权之托；

Gai hee wal kv loq,             过去五年里，

Bbei ggv seiq hu jju,            成绩有哪些，

Me mul seiq hu jju；          问题有哪些；

Mailjuq walkv loq,             未来五年里，

Bbei ner seiq hu jju,            要做哪些事，

Ddee tv gguq ddee tv；       一件又一件；

Ddaggv sigua beel,            大具红瓜子，

Gvl tvl goq ji bbei;            红白分明地；

Ni dvq gvl hal gge,            两千多名的，

Dailbia chee laq gol,           中共代表上，

Saiddoq yel neiq tee；        报告的场景；

Nge xi chee gvl la,             对我本人言，

Diailsheel chee loq nee,         就由电视里，

Komi liuq seiq nal;             虽有听见了；

Kvlpai ddee ddeeq nee,          但因年纪大，

Gvbbu heibbu yil,              既聋又昏头，

Ddee bbaiq mi me mi,           半闻半不闻，

Jjaiq wef me keke;              不怎么清楚；

Jil mei chee gvl nee,             小辈这个呀，

Nee goq seiq see mei;            你所知道的；

Hertv piel daqyil,                风吹摇树叶，

Ddee yil neiq yel laq!             应答一下吧！

Mil: Bbaqkoq mudai xiq,

Dai gge sheef je dal,

Balgal chee loq nee,

Shel bel lei heeq mei;

Gai hee wal kv loq,

Bbei ggv bbei zzaiq gge,

Ssei beil jju seiq mei;

Ddee sher gguq ddee sher,

Reiqmiq quiqzhul gol,

Kua gge sher dal waq.

Laler jji ssaq mai,

Chee dal me ssaf gge;

Halsherq gvmai tee,

Perq naiq vf gge sher,

Perq lei me zzaiq gge,

Ssei beil perq zzaiq seiq;

Gai nee bbei naiq vf,

Bbei lei me zzaiq tee,

Ssei beil bbei zzaiq yil;

Alggeeq guefja gge,

Goqkee gol nee shel,

La hal yi ceeq seiq;

Quaiqguef reiqmiq la,

Teiq zhelddee bbei nvq,

Heeq neiq zaq shel gge,

Nilwa jju ceeq nal;

Aq zee bbei yel nee,

Te waq lei ceeq tee;

Kaikeel ddeeq zzerq zzeeq,

Ddeeqmei chee gvl nee;

Jjinal leilhuq hual,

Lei huqhual yel meil!

Sso: Qiqser guef leemei,

Alggeeq guefja tee;

Heeq neiq zaq shel gge,

Nilwa gol mai tee;

Sigai alwa ddiuq,

Seiq waq lei shel nvl;

Leelcei haijjiq see,

Nge nee seeddv mei;

Zhugueq gulcaidai,

Jiheq pil nee gguf;

Zhugul daiyuaiq gge,

Nvlmei goq loq tee,

Seiq bbei bbei seif see,

Reiqmiq heeq tal gge,

Seeddv dal me ssaf;

Seiq bbei zzaiq tal mei,

Seiq bbei bbei bel ceeq.

Gadeel seiq yi mei,

Seiq bbei tvl yel nee;

Ddee sher bbei pil gguf,

Ddee sher mail gguq bbei;

Ddee kvl gguf ddee kvl,

Ddee cherl gguf ddee cherl,

Che dal ddee bbei nee;

Quaiqguef reiqmiq tee,

Heeq neiq zaq shel gge,

Nilwa gol ddee nal;

Mailjuq wal kv loq,

Bbei naiq vf gge sher,

Seiq hu jju zeel lei?

Mil: Balgal chee loq nee,

Shel bel hee mei nvl;

Mailjuq wal kv loq,,

Bbei naiq vf gge sher,

Ssei beil shel heq nal;

Nge xi chee gvl tee,

Pielperq liunaq dail,

Liunaq me see yil;

Shel bbee gel vq la,

Shel me gvl seiq yil;

Ddee he me shel la,

Haiqmal biu nee ruaq,

Me shel me ruaq gge,

Chual tv shel naiq vf;

Ggumiq ciaiq leesee,

Ddeeq goq seiq see mei;

Kuciai mefsheeq hual,

Jil huq lei hual yel!

Sso: Jilji we jilji,

Seiqka jilji bbaq,

Jil mei chee gvl nee,

Shel bel lei heeq mei;

Geezheeq beegoq tee,

Chual tv shel bbeq zeel,

Te shel neiq mi nal;

Nge xi chee gvl nvl,

Neegoq bee me yi,

Bbainaq bbai hual weq,

Weq bbee gel vq la,

Weq lei me tv nal;

Megvl xofsif tee,

Chee tv dilyif waq,

Jil gol soq bbeq yil;

Ddee tv goq nee tv,

Goq tv sheefciq hual,

Sheefciq yeyil gge,

Goq tv ni see ruq;

Bbesheeq saiddogoq,

Mail lei me ziul bbei,

Ddee saiddoq neiq yel!

Mil: Ddeeq mei jil sseeqzzee,

Te shel ddu meq mei;

Ddeeq nee qaixu yil,

Seeqzzee bbei me yel;

Nge xi chee gvl tee,

Bbei lei perq me jju,

Shelgvl megvl nee,

Niruq shel ggef jjeq.

Laji ceiperq cei,

Wecei ddee tv nvl;

Haiqmal lo nee lo,

Lo siuq lo zeil gol,

Jalyuf cheetvf see,

Bbeiggv naiq shel ye.

Jalyuf bbeiggvf see,

Alggeeq guefja gge,

Zziqu coqlerl tee;

Ddaiq neiq peel mei tv,

See neiq tal xi bbeeq,

Guefja lvla tal;

Guefja lvlaf see,

Zhuhuaq miqceef tee,

Lvqdee meeddo bbei;

Ggeq dee tv tal zeel.

Sso: Balgal chee peil loq,

Jalyuf bbeiggv naiq,

Cheeruq shel ceeq tee;

Nge nee seeddv mei,

Zhugulzhuyai tee,

Gainieq sherl nief gge,

Alggeeq guefja tee,

Jalyuf chee tv gol,

Me ggvqkeel pil yil,

Xoqxal nee seiq mei,

Seeqzzee la hal nee;

Yegoq leel me jjuf,

Tei'ee soq me loq;

Jju mei chee laq nvl,

Seeqzzee gashuf ceeq,

Yegoq meil neiq seiq.

Mailzeil ddiuqkol la,

Soqjji xijjuq nal,

Dvq neif mee gol leel,

Ddeejjef nijjef me,

Quaiqguef gol nee shel,

Tei'ee see xi nee,

Guefja loqhel yil;

Alggeeq guefja gge,

Meeddiuq cheehu tee,

Sifai lifqaiq gge,

Cheehu guefja nee;

Ggai neif zzerq ceeq seiq.

Alggeeq guefja gge,

Ozzei gol nee shel,

Sseibeil zzerf hee seiq.

Xisiul xikol nief,

Jjiddaiq bberqkeel yil,

Xiyuq yuq me bie,

Biq neiq gguq shel gge,

Gol jji chee beil tee,

Neenieq teif yi yil;

Guefja heq zherq bbeef,

Jafyuf gol jju shel,

Che shel neiq zo me.

Mil: 1949 N,

Jaifail pil nee gguf;

Alggeeq guefja gge,

Gvhei bbei xi tee;

Jalyuf chee tv gol,

Ddeeq bbei teiq liuq yil;

Xoqxal ddiuq bbei ceel,

Seeqzzee bbeeq bbei keel;

Tei'ee soq kvlpai,

Sherl gge xi leel waf,

Soqgv ddee zzeeq nee;

Seiqgvl megua bbei,

Bbeebbeeq neenee nee,

Ddee hu lei soq ddee,

Shelhuil zeeyil gge,

Guefja jailshef loq,

Seiqgvl seiqderl mei,

Gadeel lei cocoq,

Alggeeq guefja tee,

Zeihua ddeeq yel nee,

Goqkee lei yi ceeq.

Zziqu coqlerl la,

Rheeqbvl nilwa gol,

Gol yi zaq seiq nal;

Cheesseeq huilyil loq,

Shel bel lei heeq mei;

Alggeeq guefja tee,

Sheeljail gofguef loq,

Gaijuq hiul leel bbeef;

Jalyuf chee tvf see,

Lahal ggvqkeel naiq,

Chee ruq shel bel heq.

Sso: Sergv lurheeq zeel,

Aqyi mei rheeq tee;

Jalyuf cheetv gol,

Ggvqkeel neiq yel nee;

Soq bbee soq gv zzeeq,

Me see meil xi jjuq,

Tei'ee dal messaf;

Ddiuqloq xiyuq tee,

Bbeidoq ga ner shel,

Bbeidoq meil seiq mei;

Ggumu lalaq gol,

Ggvqkeel ner shel yil;

Xiaxof ceezhu soq,

Soq neiq cheelaq gol,

Zzeeteeq yel neif see.

Ceezhu gazhu ka,

Ka me mai chee laq,

Wu nee teiq pieq gge,

Laqlo soq bbee la,

Zheefnif xoqxal loq,

Seiqpieq soqtal seiq.

Gazhu dalxof ka,

Feisvl bbeeqnee yi,

Ddee xal soq me ddee,

Ddee xal soq gv zzeeq.

Yegoq jjeq pil yil,

Jelye me jju la,

Zheilfv zeiba yel,

Soq bbee soq tal yil;

Alggeeq guefja gge,

Seelhual jailshef gol,

Balpvl dal me ssaf;

Yegoq chee jjiq la,

Zaq gge nilwa tee,

Gol lei mai tal seiq.

Mil: Alggeef guefja tee,

Xikee bbeeq seiq mei,

Meeddiuq kuelddeeq yil;

Ddee hu ddee bbeq zzeeq,

Zzeeq gv me nilniq.

Ddee hu rhee loq zzeeq,

Ddee hu noqcui zzeeq,

Me nilniq bbee la;

Jalyuf chee tv nvl,

Me nilniq me tal;

Soq ner ssiulssiuf tee,

Seiq gvl me gua bbei;

Me see lei sosoq,

Me gvl lei meilmei,

See neiq tal zherq yil,

Ddeef lee chee ni seil,

Bbei bbee bbei gv zzeeq,

Gayi zeiqgv tv,

Zeiqderl xi bie naiq,

Te shel neiq ye nal;

Seiqhu bbei seif see,

Cheegol tv tal tee,

Ddeeq mei chee gvl nee,

Ddee shel neiq yel laq!

Sso: Seiqgvl me gua bbei,

See neiq tal bbei soq,

Ddaiq neiq peel xi bie,

Chee gol tv bbee tee;

Lazheeq heibeiq jerl,

Shel neiq lei mi mei;

Jalyuf chee tv gol,

Jju seiq shel we nal;

Jalyuf ggv bbee tee,

Seeqzzee cheelaq gge,

Bbeidoq gakuaq gol,

Jju seiq shel neiq yil;

Seeqzzee ddee gvl bbei,

Xofsoq cheelaq gol,

Tei’ee mefnaq zziuq,

See neiq gvl bbei meil,

Meil yel dal messaf;

Xiyuq ddiuqloq yuq,

Seiq bbei yuq ddu mei,

Ddumuq meil naiq zeel.

Mil: Seeqzzee cheelo tee,

Meelee chee gal bbvq;

Losiuq lozeil gol,

Jjeqlo waq shel nal;

Seeqzzee bbei meif tee,

Wudu nvlmei goq,

Keke ner tee nvl;

Meil neiq meil ner gge,

Xofsei cheelaq tee;

Ggvxiq bbamei nee,

Laqpu keel seiq yil;

Bbinaq ddal neifniq,

Zeilbbei tal seiq leel,

Gadeel zeiq seiq mei;

Nvlmei zeiq bbei ddal,

Jjiqddeeq ceel chee loq;

Sseiqzeiq megua tal,

Ddeenaq ddal lee yil;

Xofsei jazai nief,

Guefja shelhuil gol,

Seiqbbei meil seiq shel,

Shel zo jju zherq naiq.

Sso: Xilaq ggvq me chu,

Ggvqpa xi me liuq;

Koku cheeruq tee,

Mewaq meshel meq.

Gainief xi nee la,

Shel bel leiheeq mei;

Seiqgge ddeegvlnee,

Ssiulssiuf gol me pieq,

Ssiulssiuf cheelaq la,

Seiqgvl gol mepieq;

Ssiul gol pieq seif see,

Ssiulssiuf cheelaq gol,

Meil bbee meil bie tal.

Seeqzzee ddeegvl bbei,

Bbeiggv zherq leel bbeef;

Aizerq aiqmei seel,

Aiqmei chee mei nee,

Aizerf goq neifniq;

Wudu meil neiq gge,

Xofsei cheelaq gol,

Nvlmei jju naiq zeel.

Mil: Qiqser guef leemei,

Alggeeq guefja tee;

Habvlsalgguq bbei,

Fafzai ddeeq yel nee;

Heeq neiq zaq shel gge,

Nilwa gol neiq nal;

Ddiuqloq xi chee yuq,

Mesoq memeil nee,

See neiq gvl me ddu,

Ddaiq neiq peel me tal;

Seiqgvl megua bbei,

Nvlmei goqloq tee;

Ngvhaiq jelye nief,

Jjiddaiq cheehu tee,

Jju neif bbeeq bbeela;

Pilpi sheeshee gvl,

Miqer dder rheeq jju,

Wudu zeiq meddee,

Ddeekaq jjugvl nal;

Mesee meilyel gge,

Seeqzzee cheelaq nee,

Meil yel tei’ee nvl;

Xi nee kv metal,

Pil lei sher mejju;

Meshee ddeecherl bbei,

Ruq neiq qil gol kua,

Zeiq lei sei megvl,

Mesee meil yel gge,

Seeqzzee cheelaq gol,

Nvlmei goq nee ddeeq,

Ciqzil mewaq mei;

Aiqmei alsso xiq,

Alsso jil teekaq,

Aiq gol lo ner vq;

Jjiqddaq gvl pil seil,

Aiq juq rhee meyel,

Chee gguq soq meniq.

Sso: Xofsei ddee gvl tee,

Xizzee see gvl yil;

Xi gol kuasher bbei,

Bbeidoq ga meq mei,

Tei’ee me see nvl,

Mailgguq lei sosoq ,

Lei see bel lee yil,

Guefja shelhuil gol,

Kua gvl bie tal meq.

Tei’ee see bbeela,

Chee nvl rua bbei ji,

Xi nvl me derl liuq;

Wudu wu dal ddeeq,

Xi gol me lvllv,

Bbeidoq kuaq mei nvl;

Mailnieq mail chee ni,

Ddeef lee pil bbeela;

Guefja shelhuil gol,

She dal messaf gge;

Xofsei chee gvl tee,

Ddee cherl dal me ssaq,

Seel cher she ddu yil,

Seeqzzee bbei meif tee,

Seiq bbei die me gua,

Xofsei zzeesee yil,

Tei’ee meil seiq mei,

Bbeidoq ga bbei meil;

Seiqgvl megua bbei,

Nitv ddeelddee gge,

Ddeegvl biezherq naiq.

Mil: Bbainaq bbaitalrheeq,

Wefyi mei gge rheeq;

Lvgv talrheeq mil,

Rheeq yi ga weq nal;

Shelhuilfafzai tee,

Chuq nee rua seiq yil;

Zziyuq hual he tee,

Seiqgvl megua bbei;

Hashuq hazzee gge,

Ddeelo jju bbeela;

Seeqni mechu seil,

Xilkee me guilei;

Seelha me liail seil,

Keelaq ggeggeq gvl;

Koku cheeruq tee,

Neegoq jeldiu yil;

Cheeni see bbeeleel,

See seiq vq meniq;

Cheeni gvl seiq leel,

Gvl seiq me vq bbei;

Mailnieq mail teeni,

Rheeq gguq maiq bbee shel;

Megvl gvl see soq,

Gvl sei ee bbei soq,

Ee sei chuq bbei soq,

Chuq sei ssi bbei soq,

Xiyuq soq me sei,

Soq lei hei me taq!

Sso: Ainaq nikee zzeeq,

Ni tv shel mei nvl;

Zziqu coqlerl tee,

Lobbei bbee leel vf,

Bbei gv zzeeq seiq mei,

Lobbei gapv la,

Bbeeq zherq naiq shel ye.

Cheesseeq huilyil loq,

Cheeruq shel tee nvl;

Alggeeq guefja tee,

Meeddiuq bbeeq seiq mei,

Xi kee bbeeq yel nee,

Kuel gol liuliuq yil;

Seiqgvl megua bbei,

Laqzzeeq bbei gv zzeeq,

Gayi zeiqgv tv,

Lobbei hashuq yil,

Ddiuloq xiyuq mei,

Yuq bie zherq bbee shel,

Che shel neiq ye yil,

Naf la almi shel?

Mil: Naqmu sheelje ddiuq,

Sheelje xiyuq tee;

Laq nee lo me bbei,

Ddvqmei ha me keel;

Kee nee zhee me tvl,

Ggumu jji me muq;

Koku chee ruq tee,

Gai nee shel ddu nal;

Lobbei bbee vq mei,

Lobbei gv me zzeeq;

Gazeiq bbee vq la,

Gazeiq gv me zzeeq;

Tewaq ddubbei seil,

Zzeemei ggvzzeiq tee,

Leegv me zzeeq yil;

Mejju haruq aiq,

Ddiuqyuq me bie seil;

Xikv xizzerq nief,

Xisiul xikol gge,

Sherkuaq tv ddu bbeif;

Shelhuil gol nee shel,

Luail bel lee zo waq;

Dai gge laqcherl la,

Gogoq me tal yil,

Alggeeq guefja gge,

Gvhei bbei xi tee;

Mailsher ddoq seiq mei,

Reiqmiq zzeesee yil,

Cheesseeq huilyil loq,

Zziyuq hual he gge,

Lobbei gvzzeef see,

Xiyuq bietal shel,

Cheeko shel yel neiq.

Sso: Bbainaq bbai talrheeq,

Wefyi mei rheeq nvl;

Tei’ee soq neiq meif,

Soqsei pil nee gguf,

Hashuq zzee ner shel,

Lobbei loshuq xi,

Lahal bbeeq neiq seiq.

Goqgv noqiq mil,

Noqcui gol nee shel;

Noqmiq ssei beil tee,

Rheeloq jji yel nee;

Aqzee bbeital mei,

Aqzee lo shushuq,

Jelye shuq neiq nal;

Laqlo leel megvl,

Jjeqlo mewaq mei,

Bbeibbee gv me zzeeq;

Bbei gv zzeeq bbeeleel,

Ddeeni lei jju seil,

Ddeeni lei mejju;

Teiqbbei pil bbee la,

Gapv nee dal ddee,

Wu zeiq wu dal mul,

Che gge xi dal bbeeq.

Mil: Lobbei bbee vq la,

Lobbei gv me zzeeq;

Lobbei gv zzeeq la,

Gapv nee ddu bbeif;

Rheeqbvl nilwa gol,

Goljjeq zome shel;

Cheesseeq huilyil loq,

Shel bel lei heeq mei;

Seiqgvl megua bbei,

Lobbei bbee vq la,

Bbeigv zzeeq nerf see;

Bbei gv zzeeq seiq leel,

Gapv ddee nerf see;

Gapv ddee seiq leel,

Yilloq hof bbee tee;

Seiqbbei bbei seif see,

Chee gol tv tal tee,

Ngvl nee shel yel laq.

Sso: Meelsheeq kubbuq kvl,

Chee ni seel kv loq;

Dai neif zheilfv tee,

Reiqmiq zzee see yil;

Gucai qinif bail,

Keebvq teeldvl yil;

Lobbei bbei gv bbeeq,

Bbeeq bbei tv neiq seiq.

Eelaq bbeibbee mei,

Bei leel mejju nvl,

Dailkuai dail tal gge,

Zheilceif malma yel;

Cheehu zheilceif tee,

Bbeineiq cheegvl gol,

Kua dal me ssaf gge,

Shelhuil gol la kua,

Lobbei naiq vf xi,

Bbei lei gvzzeeq seiq.

Mil: Goceeq sikeeq beil,

Sseidaq ddeebeil gge,

Xoqxal teiq ceel yil;

Siuq neiq zeil shel gge,

Laqlo ddeebeil tee,

Soq lei gvzzeeq yil;

Xofsoq neiq chee laq,

Seiqpieq soq bel lee,

Tal bbei soq ddee seif,

Xi la gashuq pieq;

Sseifgv bbeipieq mei,

Sseifgv bbeibbee tal;

Gapv gol nee shel,

Bbeeq bbei ni naiq vf(la),

Bbeeq bbei yel xi jjuq;

Ddeekua xi gol kua,

Ddeekua wu gol kua;

Rheeqbvl nilwa gol,

Goljjeq mener seiq.

Sso: Bvl neiq bbei loq gge,

Eeleeq lobbei xi,

Ddvmai me ssee bbei,

Rheeloq jji yel nee,

Lobbei hashuq zzee,

Che bbei naiq vf mei,

Laqlo megvl la,

Lobbei lo nee meil,

Xi gguq lei sosoq,

Soqbbee gel leel vf,

Ggvna leel sosof,

Megvl sher me jju.

Xi nee gashuq pieq,

Xikee bbei bbee tal;

Wudu bbeibbee la,

Wudu bbei tal yil,

Wujjeq wu gol kua,

Kua tal rheeq tv seiq.

Mil: Xuqluq seel kee zzeeq,

Seeltv shel mei nvl;

Shelhuil bazail gge,

Tixil chee tv tee,

Bbeiggv zherq naiqzeel.

Shelhuil bazail gge,

Cheetv gol nee shel;

Gaihee chee zherl loq,

Bbei bel ceeq we nal;

Cheesseeq huilyil loq,

Shel bel lei heeq mei,

Gai nee bbei me mul,

Ddee hu jju bbeela,

Zheilfv chee laq nee,

Gvhei bbeiyel yil,

Zziyuq hual he gol,

Seiqgvl gol megua,

Kua sher bbei naiq zeel,

Tebbei shel heq yil;

Ddeeqmei cheegvl la,

Shel neiq al mi shel?

Sso: Chualko lufgof ja,

Alggeeq guefja tee;

Xikee bbeeq seiq mei,

Lo siuq lo zeil jju,

Ddeehu ddeesiuq bbei,

Bbei neiq xi jjuq seiq.

Bazail chee tv la,

Ddeehu ddeesiuq hof,

Me nilniq bbeela;

Seiqhu ddeelaq gol,

Seiqhu kua yel ner,

Ggvna kua yel naiq.

Jjeqteeq jju gge xi,

Seiqhu kua tal mei,

Seiqhu kua yel naiq.

Gguqcer jju gge xi,

Zeelyuail gguq malma,

Jelye zeiq bbeela;

Yiliaq baxai nee,

Guidil seiq jju mei,

Baibv yel naiq zeel.

Alggeeq guefja gge,

Baxai gol nee shel;

Reiqmiq quiqzhul gol,

Kuasher sseiweq bbeeq;

Mailjuq jju teebeil,

Naf nee shel yel laq.

Mil: Sherjju sher perperq,

Perq ner cheekaq la,

Ggvna perq naiq zeel.

Jjeqteeq jju chee kaq,

Lo gv zzeeq naiq zeel.

Gguqddeeq gguq malma,

Malma loq zherq bbei,

Baba yel naiq zeel.

Guefja yil'vl zil,

Zil ceeq chee laq gol,

Seiq bbei kua tal mei,

Seiq bbei kua naiq zeel.

Xiddeeq ximul he,

Kvlpai ddeeq lei ceeq,

Lobbei me lof seil,

Zzeeteeq muqgeel pv,

Zeiba yel naiq zeel.

Mil neif ssiussiuf gol,

Liuqddeeq liuqjil gge,

Chee tv me jju bbei,

Ggugguq yel naiq zeel.

Bbamei mejjuq gge,

Ssiulssiuf chee laq nief,

Gguqyi ceryi yil,

Lobbei meloq gge,

Ddeehu jjuq bbeela,

Gua xi jjuq naiq zeel.

Kvlpai ddeeq seiq mei,

Ssomil me jjuq gge,

Gol neiq chee laq gol,

Kua ner kua yel naiq,

Te bbei shel bel heq.

Sso: Leelcei haijjiq see,

Nge nee seeddv mei;

Ddiuqloq xiyuq tee,

Aqyi jil bbee leel,

Mailni mul lee gvl;

Aqyi lalaq leel,

Mailni jerqjer gvl;

Aqyi jju bbee leel,

Mailni gge lee gvl;

Aqyi sher me jju,

Mailni sher jju gvl;

Aqyi gol seiq leel,

Mailni gol seiq mei,

Golzaq zherqner yil;

Cheesseeq huil yil loq,

Shel bel lei heeq gge,

Shelhuil bazail tee,

Zziyuq hual he gol,

Kua sher shel neiq yil,

Aneiq megua bbei;

Neegoq keel seiq mei,

Sseiftee wu gol hof,

Liuliuq milddo yil,

Ja ner baxai feil,

Ggvna bbei leel jaf,

Sherjju lee chee kaf;

Lo gv zzeeq seiq yil,

Neejjeq mener seiq.

Mil: Zziyuq hual he tee,

Chee ni seel kv loq;

Baxai chee tv nvl,

Bbei ner gel vq yil,

Bbei neiq xibbeeq seiq.

Yaila baxai nief,

Yiliaq baxai feil,

Guq neiq xibbeeq seiq.

Jju neif heeq chee laq,

Mehail chee laq gol,

Baba yel leel seil,

Gamei waq shel yil,

Jelyel neiq xi jjuq.

Ga neiq ee gge sher,

Chebbei bbei bel bbeef,

Alggeeq guefja gge,

Shelba cheetv nvl,

Bbeiggv sher dal waq.

Sso: Sailaiq lulkee zzeeq,

Lultv shel mei nvl:

Fvpiq guzof tee,

Bbei lei ggv naiq zeel.

Cheesseeq huilyil loq,

Shel bel lei heeq mei;

Alggeeq guefja loq,

Jjeqteeq jju gge xi,

Jjeqteeq jju gge ddiuq,

2020 N,

Cheekvl nee gaiq seil;

Quaiqguef ddeezei bbei,

Xiakai shelhuil gge,

Ngvlv reesheel tvl,

Reesheel chee keeq loq,

Jji lei zherq bbee zeel.

Jilmei chee gvl la,

Gaigai mailmai gol,

Seiqhu mijji mei,

Ddee shel neiq yel laq.

Mil: Sifzoseejil nee,

Gai nee sheljji mei:

Alggeeq guefja tee,

Xiakai bbei bbee mei;

Zuil bbeijjeq gge lo,

Zuil perqjjeq gge sher(nvl),

Noqcui teeloq jju;

Cheehu bvlbbei gge,

Jjeqsher perq meggvf;

Quaiqguef xiakai la,

Ggvtv me tal shel.

Leijeq shel mei nvl,

Bvl neiq bbeiloq gge,

Jjeqsher perq bbee tee,

Bvl neiq bbei gol liuq,

Seiq bbei perq hof mei,

Seiq bbei perq yel naiq;

Nvlda shel dal shel,

Keelaq me liulliu,

Bbeizzaiq me tal sher,

Zhelzhe shel me niq,

Te shel neiq mi weq.

Sso: Fvpiq guzof tee,

Gaihee xikvl gge,

Holcerq chualkv gguef,

Zhuyai gueq'vlyuail,

Cheegol ggvqkeel yil,

Bbei bel lei ceeq seiq.

Quaiqguef goqdil gge,

Sseidaq bvlbbei loq,

Xoqxal me jju meif,

Xoqxal ceel yel seiq;

Chelul me to meif,

Chelul sheeq yel seiq;

Diail me zheel chee laq,

Diail lei zheel bie seiq;

Teeqjjiq gge chee laq,

Teeqjjiq sheeq yel seiq;

Rhee me jju chee loq,

Rhee lei malma yel;

Qi neif haiq bbee tee,

Sseiweq faibiail seiq.

Ximul xexeq gv,

Ggumu duailliail gv,

Sseibeil bbeizzaiq seiq.

Jjuqbbieq loqbbieq yil,

Xizzeeq me bie tee,

Jjiddaiq bber yel seiq.

Seecerq kvl hal loq,

Bbeizzaiq mei cheebeil,

Mesee mei me jjuq,

Mekua mei me jjuq;

Bvlbbei shul'oq la,

Ssi dal me ssaf gge,

Guefja goqkee la,

Sseibeil yi ceeq seiq.

Mil: Ddeeqmei cheegvl nee,

Shel bel hee chee beil,

Nge xi chee gvl la,

Neenieq zzeeq meq nal;

Dai gge sheefbaq dal,

Zhalkai pil nee gguef;

Zhugulzhuyai tee,

Gaihee cheezherl loq;

Fvpiq guzof tee,

Bbeiggv seiq hu jju,

Melvq seiq hu jju,

Zzeeqggue lei zzeeqggue,

Meeqdiul shelceeq mei;

Gaihee cheezherl jerq,

Bbeiggv zherq bbee shel,

Bbeibee shuq yel mei,

Seiq gge ddee bbeif seil,

Aqzee gol nee jjeq,

Seiq gge ddee jjef seil,

Aqzee gol nee si,

Muqyi shuf lee yil,

Cheebbei cheejjif gol,

Kua neiq heeq tal sher,

Bbei naiq shel neiq ye.

Sso: Ddiuqloq xi tee yuq,

Ddee gvq me zzeeq mei,

Lei heeq sher me jju;

Ddee gvq me zzeeq mei,

Lei si sher me jju;

Heeq neiq si shel tee,

Kuel nee bul me ceeq,

Mie muq teiq me yi,

Wu du jerq dal jjeq.

Ddeehu si mei nvl,

Gguqcer bbeeq yel nee,

Jelye zeiq seiq mei,

Bbeiner bbei me zzaiq,

Shuq ner shuq me maiq.

Ddee hu si mei nvl,

Ssomil tei'ee soq,

Ciqzeiq ner pil yil;

Eerua ceesaiq xiq,

Bbeeq bbei xiq me loq;

Eelaq bbei bbeq shel,

Bei lei xal me loq;

Ddee tal jelye tee,

Ddee lei me loq seiq.

Ddee hu si mei nvl,

Mul mei lei mul ggv,

Jil mei lei jil ggv,

Lobbei bbeiqshuq xi,

Me jjuq zeeggeeq waq.

Ddee hu si mei nvl,

Yegoq me hohof,

Nvlmei me yelye,

Kosal bbeeq zeeggeeq.

Mil: Ngvl nee shel tee la,

Waq yi waq weq nal;

Shel memai tee la,

Leijeq jju mvl see.

Ddee hu si mei nvl,

Laqqu sherq yel nee,

Bbeigvl bbeiloq gge,

Ddee lo jju bbeela,

Mebbei zeeggeeq waq.

Ddee hu si mei nvl,

Leekol tee meliuq,

Ceesaiq tee mexiq;

Ga gge tee me soq,

Huq yi bbuqfv lerq,

Nil yi leigaiq bbiq,

Huqnil lei dobei,

Bokai seeq dal dol,

Kuaqsher bbei zeeggeeq.

Sso: Naf nee te leel shel,

Ngaq la niruq shel;

Ddee hu si mei nvl,

Seeddv qal me jju,

Bbeiner lo jju la,

Seiq bbei ner me see.

Ddee hu si mei nvl,

Zzeeteeq jelye tee,

Zheezheeq ner mesee,

Kuelgv bbei me gvl.

Ddee hu si mei nvl,

Yegoq sherddu bbeeq;

Shufceeq jelye tee,

Zeiq kuel sherl me loq.

Alcai jjiceiq si,

Si ko leel lei shel,

Muqyi ssei beil jju,

Nilniq me ddu nal;

Si rheeq jju bbeela,

Laqmail mexuq bbei,

Laqceil nee nieq doq,

Muqyi shuf lee yil,

Lei heeq zherq bbee shel,

Seeddv dal messaf,

Keelaq liulliu naiq.

Mil: Xiyuq ddiuqloq yuq,

Ddumuq jju meq nal;

Ddee hu ddee bbeq yuq,

Yuqgv me nilniq.

Ddee hu heeq mei jjuq,

Ddee hu si mei jjuq,

Me nilniq bbee la;

Dai neif zheilfv nvl,

Chee hu gol liuq mei,

Ssomil neif niq liuq,

Si mei liuq me jil,

Heeq mei liuq me ddeeq;

Me rhee me gua gge,

Ddee gvl me jjuq bbei;

Si mei lei heeq zherq,

Me jju lei jju zherq,

Te wei bbei yel neiq.

Sso: Chee ni seel kv loq,

Dai neif zheilfv tee;

Seiq gge ddee bbei nief,

Seiq gge ddee jjif tee;

Jjeqteeq seiq hu jju,

Seiq bbei baba ner,

Bbeibee shushuq yil,

Baba yel neiq seiq.

Jjiqbbieq hol neiq mei,

Malma meloq meif,

Jjiq lei malma yel,

Xizzeeq tal seiq mei,

Ceesaiq derlgv zzeeq.

Ceesaiq me jjuq meif,

Bbu'aiq ceelyuq yel,

Jilxiq ddeeq lei bie,

Nee mei ggeq lei zzee;

Zzee zo jju seiq mei,

Qi mei jelye bie,

Si mei lei heeq zherq,

Heeq ree jji zherq seiq.

Mil: Yegoq ximul jjuq,

Tei'ee soq xi jjuq,

Ggumu me lalaq,

Gguqyi ceryi jju,

Cheehu xi jjif gol,

Baba yelneiq seiq;

Eelaq bbei bbee mei,

Bei me jju chee laq,

Dailkuai dail yel neiq.

Laqlo soq bbee meif,

Laqlo meil yel neiq.

Seeddv qalderl meif,

Heeq bee meilyel neiq.

Lajjer cheelaq gol,

Nvlmei bbeiyel neiq;

Kuaqsoq cheelaq gol,

Faf nee meil yel neiq.

Jjeqteeq jju meif gol;

Seiq yel tal mei yel,

Seiq kua tal mei kua,

Seiq meil tal mei meil,

Merhee megua gge,

Ddee jjif teiq me jjuq.

Chebbei ddee bbei nee,

Jjeqjju xijjif la,

Yibbiq haiqmal bberq,

Goq nee bberq bel yil;

Xiyuq xiciuggv,

Xiciu ggv bbee shel,

Ga'vq zoq neiq seiq.

Sso: Wal lv see guaq tvq,

Wal tv shel mei nvl:

Alggeeq zhuguef tee,

Heeq neiq zaq leel bbeef;

Guefmiq cheelaq gge,

Ggumu lalaf see,

Ggvtv tal meq zeel.

Cheesseeq huilyil loq,

Shel bel lei heeq mei;

Alggeeq guefja gge,

Zziyuq hual he tee;

Ddeeq neiq jil me shel,

Mul neiq dder me gua;

Ggumu lalaq yil,

Sseesherq halyi gge,

Chee gol tv naiq zeel.

Mil: Ggumu lalaq ner,

Cheetv leel lei shel;

Ddiuqloq xi chee yuq,

Seiqgvl megua bbei,

Mesee mejjuq yil;

Ggumu lalaq gol,

Liuqddeeq mei dal waq.

Ggumu lalaf seil,

Seiqlo bbeibbee mei,

Seiqlo bbeibbee tal;

Xibbeeq mei zeil gv,

Xi leel tv neif seil,

Wu la tv bbee tal;

Xi aq mei zeilgv,

Wu la aq bbee tal.

Rheeqbvl nilwa gol,

Wudu chee gvl tee,

Golbbiq dal massaf,

Yegoq cheejjiq la,

Nvlmei heiheeq tee,

Meshel pil bbeela,

Mesee mejjuq mei,

Aqzee bbei yel nee,

Cheesseeq huilyil loq,

Quaiqguef reiqmiq bbei,

Ggumu lalaq ner,

Geezheeq cheeruq tee,

Meeqdiul shelceeq ddeq?

Sso: Yegoq xi ddee jjiq,

Heeq neiq zaq leel bbeef;

Yegoq chee jjiq tee,

Ggumu lalaf see,

Heeq neif zaq tal meq.

Guefja gol nee shel,

Quaiqguef reiqmiq bbei,

Ggumu lalaf see,

Quaiqguef heeq tal shel;

Zhugulzhuyai tee,

Cheetv seeddv yil,

Mailsher bbeibbee mei,

Gaisher lei me mil,

Seeddv lei seeddv,

Cheesseeq huilyil loq,

Cheeruq shel ceeq nal;

Zhuhuaq miqceef nee,

Gol jji mei chee beil,

Jil nee shel yel laq.

Mil: Nge xi chee gvl nvl,

Gol yi me jji nal;

Shel neiq mijji mei,

Alggeeq guefja tee;

Ddeedvq holxi gge,

Lucer kvl tee rheeq;

Cichaq zheilfv tee,

Tee sher tee dal gua,

Beqsil zzee me zhel;

Beqsil gol nee shel,

Gguqjju gguq malma,

Malma gv me zzeeq;

Gguqjil waq bbee la,

Gguq ddeeq bie yel nee,

Kvlpai ssei jil nee,

Sheef hee xi bbeeq yil,

Neegguq serlqiq gge,

Nilwa gol jji tee,

Shelbbee gel vq leel,

Shelgv mezzeeq seiq.

Sso: Laler jjissaq mai,

Chee dal messaf gge;

Zza jerq yi nee yi,

Yi jerq shusherl keeq;

Yiguef sso chee nee,

Alggeeq guefja gol,

Zzasiq lei ceeq mei,

Ciai neif pal chee nee,

Xisiul dal messaf;

Yapiailyai shel gge,

Ddeesiuq bul ceeq yil;

Alggeeq guefja gge,

Ssoquf cheelaq gol,

Yeteeq meil yel nee;

Yeteeq gguqcer bbeeq,

Ggumu jerqjer yil,

Siulsiu xi me ggvq;

Meeddiuq xi nee ggai,

Oga xi gge bie,

Che bbei gol jji tee,

Neenieq teif yi yil,

Alggeeq guefja tee,

Lvla zherq leel bbeef,

Guefmiq cheelaq gge,

Ggumu lalaq ner,

Chee ruq shel ceeq meq.

Mil: Ddiuqloq xiyuq tee,

Yuq lei mul ddu bbei,

Gguq lei cer ddu bbei,

Ddu bbei ji bbeela;

Dai neif zheilfv tee,

Zziyuq hual he gol;

Gguqcer lei neef jju,

Sseesherq ddiuqloq yuq,

Chee gol tv bbee shel;

Yiyuail bbeeq bbei ceel,

Yisei bbeeq bbei xiq,

Cher'ee siuq zeil jju,

Mul neiq dder me shel,

Sso neiq mil megua;

Gguqcer rheeq jju la,

Gguqliuq gguq malma,

Bbei xi jjuq seiq mei,

Cher'ee haiqgv bbeeq.

Gguqddeeq jju bbee leel,

Gguqjil lei bie tal;

Gguqjil jju bbeela,

Malma ga tal seiq.

Gguqcer leel mejjuf,

Ddee kua wu gol kua,

Ddee kua yegoq kua,

Ddee kua shelhuil kua,

Kuasher leel lei shel,

Shelsei me tal seiq.

Sso: Daizheil lidal la,

Beqsil zzeesee yil;

Ddeeq neiq jil gol hof,

Mul neiq dder gol kua;

Qeqcee qeqlal gv,

Zzerzzer coco gv,

Ggaihee xexeq gv,

Ddiuqbbei malma yil,

Beqsil cheelaq tee,

Seiqpieq ggaihee tal;

Ggumu lalaq gge,

Gvhei bbei yel neiq.

Ggumu gguqcer bbeeq,

Nvlda loq nee ceeq,

Te shel ddu ye yil;

Zzeemei ggvzzeiq tee,

Xizzee me dvxaiq,

Seiqpieq seiqzzee tal,

Seiqni zzeetal gge,

Chee gol tv naiq zeel.

Mil: Alggeeq zhuguef gge,

Pvzzee chee laq nee,

Mailjuq ziul yel gge,

Gguqcer malma gge,

Laqmu cheetv nief,

Cher'ee chee hu tee,

Soq mei see naiq zeel.

Gguqcer malma gv,

Gguqcer malma xi,

Bbeibbee mei leel waf,

Teeldvl yel naiq zeel.

Ximul cheelaq gol,

Liuqddeeq dal messaf,

Nvlmei jjujju yil,

Ximul cheelaq gge,

Gguggu xexeq gv,

Malma yel naiq zeel;

Ximul cheelaq tee,

Nvlmei bbiq seiq mei;

Ggumu lalaq gge,

Cheegol tv naiq zeel.

Sso: Ddiuqloq xiyuq tee,

Mejju gol tal la,

Gguqcer zherq me tal,

Shel yi te shel nal;

Wefyi meirheeq tee,

Ddeeni gol bbee mei,

Jel nee gol ner meq;

Xi gol zzeezzee la,

Jel nee zzeezzee ner;

Jelye cheebbeiq tee,

Mejju metal nal;

Gguqcer leel mejjuf,

Wu nee seiq derl mei,

Ddee lo bbei leel bbeef;

Mejju lei jju gge,

Ddeeni jju gvl see.

Yegoq ddeejjiq tee,

Jju neif heeq bbeela;

Ddeegvl gguq ddu bbeif;

Ddeeq neiq jil me gua,

Hazzee ha meyiq,

Jjiqteeq jjiq me qil,

Huqyil me yingvq,

Ddeekaq gguq ddeekaq,

Nvlmei mebbiq yil,

Gguq neiq kel nee die,

Cheedie me rer la,

Gguq neiq cer nee die,

Merer mejjuq yil,

Gguqjil jju bbeela,

Yiyuail yisei gol,

Ggvna milddo yil,

Cher’ee teeq ner la,

Cher’ee shuqteeq naiq.

Mil: yil nee zzeeq memaiq,

Zzeeq nee hiul memaiq,

Hiul nee jji memaiq,

Ggumu keelaq tee,

Mexeq liulliu seil,

Cher’ee jjiq’ee tee,

Meteeq pil bbeela;

Ggumu lalaq gol,

<p class="MsoNormal" align="left" style="line-height: 15pt; background-image: initial; background-position: initial;