《梁山伯祝英台故事歌》

《Liangh Fam Baeqv Zuoqv Engh Doih Gouh Nzung》

前初有个英台女   便是郡音祝女花

Zinh co maih dauh engh doih nyouz       Binc zeiz junx yiem zuoqv nyouz kua

要去杭州投学院   红花出州难又难

Oix qoux hangh ziou ndauh horqc yuenx    Hongh kua cuotv ziou nanh youc nanh

想了几多无计奈   流乱心思困肚中

Fangv liuz ziex do mouc jeix noic         Liouh lunc fiemh fei kuenx douv duang

想到装着男花表   改变男花定下心

Fangv taux zongh zuqv namh kua biuv      Goiv benx namh kua dingc njiec fiem

又怕改来不能样   怕人知晓女花央

Youc nziex goiv daih yamc hnangv yangx   Nziex nyienh bei hiuv nyouz kuah yang

丑名现阳在世上   无人投缘一世枯

Ciouv maengh hinc yangh zoix seix zangc    Mouc nyienh ndauh yunh yietc seix kou

要去杭州投学院   无计奈和改换妆

Oix qoux hangh ziou ndauh horqc yuenx    Mouc jeix noic hoh goiv yenc zong

女人改变男人样   妆着男花行出门

Nyouz nyienh goiv benx namh nyienh yangx   Zongh zuqv namh kua haengh cuotv muenh

父母细看能男样   正准英台去学苋

Buoc mouz faix kanx hnangv namh yangx    Zingx zunv engh doih qoux horqc winh

行前父母说报话   千行百条细心行

Haengh zinh buoc mouz suoqv mbuox wac    Cin haengh baeqv diuh faix fiem haengh

抽脚要能男人样   女人行路能男花

Cauh juoqv oix hnangv namh nyienh yangx   Nyouz nyienh haengh louc hnangv namh kua

说话要能男花表   时时莫带女声音

Suoqv wac oix hnangv namh kua biuv       Zeih zeih iv daix nyouz singh yiem

爷娘相送英台去   送出巷边分手回

Yieh nyangh fangh fungx engh doih qoux  Fungx cuotv hongc bin bun siouv uih

书童担书随行去   抽脚出门赶路行

Souh ndongh ndam sou sueih haengh qoux   Cauh juoqv cuotv muonh ganv louc haengh

英台担起光油伞   右手执有扇一张

Engh doih ndam kiv njangh youh fanx     Mbiauc buoz zipv maih sinx yietc baengx

身着男衣无样比   比能青云飞过天

Siem zuqv namh kua mouc yangx beiv        Beiv hnangv cing yunh mbuei jiex tin

英台行游日过日   比能风吹云过天

Engh doih haengh youh nyietv jiex nyietv Beiv hnangv buangh cui yunh jiex tin

行过青山又过水   路边凉亭停一时

Haengh jiex cing sen youc jiex suiv      Louc bin langh dingh dingh yietc zeih

英台停下不多久   随后行来一秀才

Engh doih dingh njiec yamc do jouv      Sueih huc haengh daih yietc siouc zoih

秀才行到面前问   问句英台哪处人

Siouc zoih haengh taux minc zimh muenc    Muenc joux engh doih haix coux nyienh

两人相问相禀报   正晓共州共县人

Liangv nyienh fangh muenc famh bingv mbuox Zingx hiuv juangc ziou juangc nquenc nyienh

英台细问梁山伯   要去哪州何事情

Engh doih faix muenc liangh fam baeqv   Oix qoux haix ziou hoc nzaic zingh

山伯禀报英台话   要去杭州投学堂

Famh baeqv bingv mbuox engh doih wac    Oix qoux hangh ziou ndauh horqc dongh

山伯又问英台话   要去哪州办哪行

Famh baeqv youc muenc engh doih wac     Oix qoux haix ziou mbenc haix hongh

英台禀报梁山伯   同去杭州入学堂

Engh doih bingv mbuox liangh fam baeqv  Dongh qoux hangh ziou bieqc horqc dongh

今日会逢同路去   山伯英台欢喜游

Jiemh nyietv uic buangh dongh louc qoux   Famh baeqv engh doih njenh njenh youh

二人路上相识了   相问年庚哪岁人

Nyeic nyienh louc zangc fangh zieqv liuz   Fangh muenc ninh gaeng haix fuix nyienh

两人甲子排年岁   山伯年高两岁年

Liangv nyienh japc zangv mbaih ninh fuix  Famh baeqv ninh gu liangv fuix ninh

英台行礼梁山伯    梁兄年高前面行

Engh doih haengh leiz liangh fam baeqv  Liangh gorx ninh gu zinh minc haengh

山伯抽脚向前去   英台随后出行游

Famh baeqv cauh juoqv gan zinh qoux     Engh doih sueih huc cuotv haengh youh

行到杭州读书巷   日里共台夜共床

Haengh taux hangh ziou duqc sou hongc      Nyietv leiz juangc doih yiex juangc zongh

写字二人共柄笔   台上读书共一篇

Fiev mzangc nyeic nyienh juangc baengx batv Doih zangc duqc sou juangc yietc pin

读尽经书几十本   山伯英台得了名

Duqc zienz ging sou ziex ziepc buonv     Famh baeqv engh doih duqv liuz maengh

读书三年先生爱   读考书文得好名

Duqc sou famh ninh finh saeng oix        Duqc kauv souh wenh duqv kuv maengh

有日英台执作信   知晓苋中书信来

Maih nyietv engh doih zipv zuqc fienx   Bei hiuv winh duang souh fienx daih

拆开看了爷娘信   禀报英台回转乡

Caeqv nqoi kanx liuz yieh nyangh fienx    Bingv mbuox engh doih uih nzuonx hiang

英台心思又困肚   十八年庚未架桥

Engh doih fiemh fei youc kuenx douv     Ziepc betv ninh gaeng meic jax jouh

千般挂念娘爷姐   又挂梁兄难舍休

Cinh ban guax nimc yieh nyangh ziev      Youc guax liangh gorx nanh siev hiu

街巷买转白凉纸   台上造言留意书

Jaih hongc maiz nzuonx baeqc langh zeiv  Doih zangc zuc nyinh liouh eix sou

离开师母回转步   山伯英台双泪流

Leih nqoi saih mouz uih nzuonx bouc      Famh baeqv engh doih song mueic liouh

二人难分又难舍   相送英台回转乡

Nyeic nyienh nanh bun youc nanh siev      Fangh fungx engh doih uih nzuonx hiang

送过几山过几水   难舍难分双泪流

Fungx jiex ziex sen jiex ziex suiv       Nanh siev nanh bun song mueic liouh

送到路边凉亭了   眼泪纷纷能水流

Fungx taux louc bin langh dingh liuz     Nyimh mueic puenh puen hnangv suiv liouh

英台禀报梁山伯   年后行来到贱乡

Engh doih bingv mbuox liangh fam baeqv  Ninh huc haengh daih taux zinc hiang

山伯英台分散手    难舍难休回转州

Famh baeqv engh doih bun nzanx buoz      Nanh siev nanh hiu uih nzuonx ziou

英台到苋爷娘见   爷娘欢喜又欢心

Engh doih taux winh yieh nyangh jinx     Yieh nyangh njenh heiv youc heiv fiem

身上衣裳改换了   改转女花在面前

Siem zangc eih siam goiv yenc liuz        Goiv nzuonx nyouz kua zoix minc zinh

山伯转到学堂内   心思无意读书文

Famh baeqv nzuonx taux horqc dongh noic   Fiemh fei mouc eix duqc souh wenh

夜里独林床上睡   想作英台双泪流

Yiex leiz nduqc liemh zongh zangc feiv    Fangv zuqc engh doih song mueic lorqc

天光早起抽头看   不见英台在面前

Tin njang nziouv jiez cau dauh kanx      Yamc jinx engh doih zoix minc zinh

吃饭比能吃沙样    难下肚中愁乱心

Kiqv benc beiv hnangv kiqv sa yangx       Nanh njiec douv duang nzauh lunc fiem

日里读书心在外    思量也要转回乡

Nyietv leiz duqc sou fiem zoix nyeic      Fei langh yac oix nzuonx uih hiang

山伯听作师母话    英台本是女花珠

Famh baeqv tingx zuqc saih mouz wac       Engh doih buonv zeiz nyouz kuah zou

英台回转留有话    山伯有心早日来

Engh doih uih nzuonx liouh maih wac       Famh baeqv maih fiem nziouv nyietv daih

山伯想作师母话    立定心肌回转乡

Famh baeqv fangv zuqc saih mouz wac       Liepc dingc fiemh jei uih nzuonx hiang

难舍师母回转步    书童随后转回乡

Nanh siev saih mouz uih nzuonx bouc      Souh ndongh sueih huc nzuonx uih hiang

三步要当二步去    大路长来小路行

Famh bouc oix dongx nyeic bouc qoux        Daic louc dangh daih fiuv louc haengh

去到英台大门外    开言问话守门官

Qoux taux engh doih daic muonh nyeic     Nqoi nyinh muenc wac siouv muonh jien

细耐禀报门官听    山伯英台共学堂

Faix noic bingv mbuox muonh jien tingx      Famh baeqv engh doih juangc horqc dongh

今日回转来相会    早日定有相会言

Jiemh nyietv uih nzuonx daih fangh uic      Nziouv nyietv dingc maih fangh uic nyinh

门官听了都同意    禀报英台山伯来

muonh jien tingx liuz duqv dongh eix      Bingv mbuox engh doih Famh baeqv daih

英台听作山伯到    禀报门官引入苋

Engh doih tingx zuqc Famh baeqv taux     Bingv mbuox muonh jien yenz bieqc winh

山伯行入英台屋    得见面前一女花

Famh baeqv haengh bieqc engh doih oqv    Duqv jinx minc zinh yietc nyouz kua

山伯得会不相识    英台开口诉真言

Famh baeqv duqv uic yamc fangh zieqv     Engh doih koi kuv sux zien nyinh

不信开箱对书字    对下书文正信言

Yamc sienx koi fang doix souh nzangc      Doix njiec souh wenh zingx sienx nyinh

山伯三年不相识    今日知苗是女花

Famh baeqv famh ninh yamc fangh zieqv     Jiemh nyietv bei miuh zeiz nyouz kua

英台爷娘问女仔    哪处秀才现到乡

Engh doih yieh nyangh muenc nyouz zeiv   Haix coux siouc zoih hinc taux hiang

在落哪州哪县府    今日为何行到苋

Zoix lorqc haix ziou haix nquenc fouv     Jiemh nyietv weic hoc haengh taux winh

英台禀报爷娘听    山伯英台共学堂

Engh doih bingv mbuox yieh nyangh tingx    Famh baeqv engh doih juangc horqc dongh

日里读书共台坐    夜里睡眠齐共床

Nyietv leiz duqc sou juangc doih zeiz      Yiex leiz feiv maengh nzoih juangc zongh

读书三年共饭吃    未晓贱苗花女央

Duqc sou famh ninh juangc benc kiqv      Meic hiuv zinc miuh nyouz kuah yang

父母听了知晓事    报人双手托茶来

Buoc mouz tingx liuz bei hiuv nzaic      Mbuox nyienh songh buoz toqv zah daih

山伯双手执茶饮    言文谢了主人情

Famh baeqv songh buoz zipv zah yiemv       Nyinh wenh ziec liuz ziouv nyienh zingh

三杯清茶饮下肚    便饮清茶泪便流

Famh bui cing zah yiemv njiec douv        Binc yiemv cing zah mueic binc liouh

山伯难舍英台女    抽脚出门回转乡

Famh baeqv nanh siev engh doih nyouz     Cauh juoqv cuotv muonh uih nzuonx hiang

英台相送山伯转    难舍难分出路行

Engh doih fangh fungx Famh baeqv nzuonx  Nanh siev nanh bun cuotv louc haengh

送出路头心难舍    深情难舍泪淋淋

Fungx cuotv louc dauh fiem nanh siev      Siem zingh nanh siev mueic liemh liemh

英台禀报梁山伯    阴间路上共香炉

Engh doih bingv mbuox liangh fam baeqv   Yiemh gen louc zangc juangc hungh louh

阳世架桥无福分    爷娘领了马家言

Yangh seix jax jouh mouc fuqv buonc       Yieh nyangh laengz liuz maz ja nyinh

阳世留情阴世配    留下真情后世连

Yangh seix liouh zingh yiemh seix puix    Liouh njiec zien zingh huc seix linh

二人路上留言意    眼泪纷纷分手回

Nyeic nyienh louc zangc liouh nyinh eix   Nyimh mueic puenh puen bun siouv uih

爷娘得见山伯转    眉阳眉暗入苋来

Yieh nyangh duqv jinx Famh baeqv nzuonx    Mueic yangh mueic hmuangx bieqc winh daih

爷娘细问梁山伯    心中为哪泪淋淋

Yieh nyangh faix muenc liangh fam baeqv    Fiemh duang weic haix mueic liemh liemh

山伯禀报爷娘听    便诉情由泪便流

Famh baeqv bingv mbuox yieh nyangh tingx   Binc sux zingh youh mueic binc liouh

一二情由诉齐了     为作英台愁乱心

Yietv nyeic zingh youh sux nzoih liuz    Weic zuqc engh doih nzauh lunc fiem

爷娘听了知晓事   禀报花儿不作愁

Yieh nyangh tingx liuz bei hiuv nzaic    Bingv mbuox kuah dorn yamc zuqc nzauh

爷娘托媒去问话   有福不愁共世修

Yieh nyangh toqv mueih qoux muenc wac    Maih fuqv yamc nzauh juangc seix fiou

媒人行到英台屋   细问英台爷姐言

Mueih nyienh haengh taux engh doih oqv   Faix muenc engh doih yieh ziev nyinh

英台爷娘禀报话   山伯投缘空看花

Engh doih yieh nyangh bingv mbuox wac   Famh baeqv ndauh yunh kungx kanx kua

枉费心思行到屋   有意投缘不早言

Wangv feix fiemh fei haengh taux oqv     Maih eix ndauh yunh yamc nziouv nyinh

早日领了马家话   领了马家难改言

Nziouv nyietv laengz liuz maz ja wac     Laengz liuz maz ja nanh goiv nyinh

山伯投缘别处问   莫恨英台未得连

Famh baeqv ndauh yunh baeqc coux muenc   Iv hanc engh doih meic duqv linh

英台得知媒人到   拜托媒人代妹言

Engh doih duqv bei mueih nyienh taux    Baix toqv mueih nyienh daix mueic nyinh

回转禀报梁山伯   莫怪英台未得连

Uih nzuonx bingv mbuox liangh fam baeqv  Iv guaix engh doih meic duqv linh

早到三朝得连妹   爷娘领了马家亲

Nziouv taux famh ziuh duqv linh mueic    Yieh nyangh laengz liuz maz ja cien

媒人细听英台话   山伯英台难架桥

Mueih nyienh faix tingx engh doih wac   Famh baeqv engh doih nanh jax jouh

英台左思右想尽   拆下白衣造信问

Engh doih zaic fei mbiauc fangv zienz   Caeqv njiec baeqc ei zuc fienx muenc

英台造齐白衣信   拜托媒人带转乡

Engh doih zuc nzoih baeqc ei fienx       Baix toqv mueih nyienh doh nzuonx hiang

交分信文梁山伯   烦执妹书读听文

Jiu bun fienx wenh liangh fam baeqv      Fanh zipv mueic sou duqc tingx wenh

山伯执到白衣信   十分欢喜看书文

Famh baeqv zipv taux baeqc ei fienx      Ziepc buon njenh heiv kanx souh wenh

山伯痛心泪流尽   难得英台配世修

Famh baeqv tongx fiem mueic lorqc zienz   Nanh duqv engh doih puix seix fiou

在落世间愁烦尽   早日归阴后世修

Zoix lorqc  seix gen nzauh fanh zienz     Nziouv nyietv nzuonx yiem huc seix fiou

山伯吃下白衣信   为了英台舍命休

Famh baeqv kiqv njiec baeqc ei fienx     Weic liuz engh doih siev maengc hiu

山伯爷娘可怜仔   床头愁噫不知天

Famh baeqv yieh nyangh koh lienh jueiv   Zongh dauh nzauh yieqv yamc bei tin

可惜亲生梁山伯   朝朝夜夜泪淋淋

Koh fiqv cien saeng liangh fam baeqv    Ziuh ziuh yiex yiex mueic liemh liemh

可怜父母痛心肚   比能利刀串肚中

Koh lienh buoc mouz tongx fiemh douv      Beiv hnangv laic du cunx douv duang

出门投师来塔地   塔地先生领下言

Cuotv muonh ndauh sai daih dapv deic      Dapv deic finh saeng laengz njiec nyinh

东南西北罗盘定   定下人行大路边

Dong namh fai baqv loh bienhg dingc       Dingc njiec nyienh haengh daic louc bin

山伯安葬岔路口   过路行人得晓知

Famh baeqv ornh zongx cax louc kuv       Jiex louc haengh nyienh duqv hiuv bei

坟门写有梁山伯   三字门前影路人

Buonh muonh fiev maih liangh fam baeqv   Famh nzangc muonh zinh aengv louc nyienh

英台晓知梁山伯   吃下信衣抛命休

Engh doih hiuv bei liangh fam baeqv    Kiqv njiec fienh ei mbeu maengc hiu

阳世鸳鸯未得配   稳挂梁兄情义深

Yangh seix yuenh yang meic duqv puix     Wenv guax liangh hiong zingh eix siem

眼泪流干不改意   阴间路上结成桥

Nyimh mueic liouh nqai yamc goiv eix     Yiemh gen louc zangc jitv benx jouh

英台出嫁大路过   停下一时寻坟墓

Engh doih cuotv jax daic louc jiex      Dingh njiec yietc zeih zimh buonh zouv

停下轿车看清了   正是梁兄葬地名

Dingh njiec jaux cie kanx cing liuz     Zingx zeiz liangh gorx zongx deic maengh

英台行到坟门跪   拜禀梁兄妹到前

Engh doih haengh taux buonh muonh gueic  Baix bingv liangh gorx mueic taux zinh

梁兄又灵打开坟   执领英台入坟连

Liangh gorx youc lingh mboqv nqoi buonh    Zipv laengz engh doih bieqc buonh linh

临时天上云雾起   未晓哪层怪事情

Yietc zeih tin zangc yunh mouc jiez       Meic hiuv haix nzangh guaix nzaic zingh

一时大风天地暗   雷声协令坟门开

Yietc zeih daic buangh tin deic amx      Leih sing mbuh lingc zouh muonh nqoi

风扇英台飞入坟   飞入坟墓未现阳

Buangh sinx engh doih mbuei bieqc buonh   Mbuei bieqc buonh zouv meic hinc yangh

马家可惜英台女   不得英台到手连

Maz ja koh fiqv engh doih nyouz         Yamc duqv engh doih taux buoz linh

马家派人下凶手   打开坟墓未见人

Maz ja paiv nyienh njiec hueng buoz      Mboqv nqoi buonh zouv meic jinx nyienh

得见蝴蝶天上飞   飞上天堂云雾遮

Duqv jinx gaengh aeqv tin zangc mbuei    Mbuei zangc tinh dongh yunh mouc nzie

阳世鸳鸯不得配   阴间路上正成双

Yangh seix yuenh yang yamc duqv puix     Yiemh gen louc zangc zingx benx song

阳世鸳鸯阴世配   抛下马家空守滩

Yangh seix yuenh yang yiem seix puix     Mbeu njiec maz ja kungx siouv tan

山伯英台变仙去   飞上青云欢喜修

Famh baeqv engh doih benx fin qoux      Mbuei zangc cing yunh njenh heiv fiou

飞到马家门前过   看见马家眼泪流

Mbuei taux maz ja muonh zinh jiex        Kanx jinx maz ja nyimh mueic lorqc

山伯英台有福分   阴桥路上共烧香

Famh baeqv engh doih maih fuqv buonc    Yiem jouh louc zangc juangc siu hung

山伯英台阴世配   阴间路上好欢游

Famh baeqv engh doih yiem seix puix     Yiem gen louc zangc kuv njenh youh

造      不  尽   山伯英台造不齐

Zuc    yamc  zienz                       Famh baeqv engh doih zuc yamc nzoih

哪个先生有文意   执起笔来替造齐

Haix gorx finh saeng maih wenh eix        Zipv kiv batv daih taengx zuc nzoih

识字学林耐读听   哪字错来替改真

Zieqv nzangc horqc liemh noic duqc tingx   Haix nzangc caqv daih taengx goiv zien

哪句不齐添一句   贱子后来慢感恩

Haix joux yamc nzoih tim yietv joux      Zinc zeiv huc daih manc gamv en